По благословению
Преосвященнейшего Владимира,
епископа Кременчугского и Лубенского
Суббота, 23.09.2017, 23:04

Приветствую Вас Гость | RSS
ГлавнаяСвт. Иоанн | Доброе кино
Меню сайта

Каталог фильмов

Наш опрос
Оцените мой сайт
Всего ответов: 162

Статистика

Онлайн всего: 1
Гостей: 1
Пользователей: 0

  
 
  
Главная » Святитель Иоанн » Служба

Служба святителю Иоанну
Служба Святителю Иоанну
 Шанхайскому и Сан-Францисскому
Чудотворцу


На Великой Вечерне

На ГОСПОДИ, ВОЗЗВАХ стихиры

Святителю на 8, глас 6, подобен: Все отложше:

Воспоем святителя Христова Иоанна, Богом дарованнаго молитвенника нам, иже по вся дни святую Литургию совершая, причащением же таин Святейших укрепляем, исходя на делание свое бодренно и в молитве пребывая непрестанной, поспешая в домы страждущих и в больничныя палаты к обреченным, тако делая весь освящен и милостив явися, исцелений и прозрения сподоблен дара свыше, дерзновенный к Богу сей ходатай о спасении душ наших.

Добродетельными воспитан родительми, правду же и истину издетска возлюбив, но еще не слыша звания, еже вземши крест во след Христу ходити, но уже пленена ти душа твоя, о Иоанне, житии святых и образы пречудными, тиих, иже даже свой живот не пощадиша, на судищи пред цари гонители, но и тиих иже за цари благочестивыя, споборая им на смерть идоша радостне, тако, святе Иоанне, непорочен ты пребыл еси в пути, оправдания Господни сохраняя присно.

Воспоем святителя Христова Иоанна, отроком, отроковицам и младенцем ласкова целителя, возрастным советодавца мудра же и твердаго, матерем о чадах известителя, сей крещаемым же и венчаемым благословения податель, провожаемым в жизнь вечную молитвенник он вернейший, сей ревнитель лепоты и чина службы Божия, пастырь же и архипастырь, предводящий овцы своя богоданныя, како ведаеши ты сердца и нас поющих тя, о. Иоанне, како утешаеши нас и еще утешиши, о святый Владыко, слыши нас любовию поющих тя.

Ины стихиры, глас 3:

Преподобием и правдою пожив на земли, и добре стадо Христово спас, ветхаго человека совлекуя, и прилоги вражия отразил еси, неусыпным бдением и зельным пощением и молитвою пламенною ко Господу, юже о нас ныне вознеси, Иоанне.

Неусыпному трезвению твоему како не дивимся, и постническое житие твое како не воспоим, посреде бо мiра во зле лежащего подвизался еси, пустынникам древним ревнуя, темже и любовь ко Господу стяжал еси, истинную и нелицемерную, еюже покрый нас, чтущих память твою.

Истиною Православия препоясався, добрый служитель Христова Евангелия быв, пращею словес твоих, волки тяжкия отгнал еси, не исповедающия Христа истинную премудрость Божию, и иныя чуждыя премудрости ищущия, темже и нас умудри во спасение, блаженне и богомудре Иоанне, чтущия светло всекрасную память твою.

СЛАВА, самогласен, глас 6: Человече Божий, архипастырю избраннейший, светильниче зарубежия русскаго, вдохновителю языков различных, странниче в мiре сем временнем, наследниче премирнаго Царства Небеснаго, Иоанне, Святителю возлюбленне, моли Господа о всех нас, присно молящих тя.

И НЫНЕ, БОГОРОДИЧЕН догматик а-й, гласа.

Вход, прокимен, и ЧТЕНИЯ 3:

НА ЛИТИИ стихира храма и стихиры Святителю, глас 6:

Отроку ти бывшу еще младу, умилился еси словесем Христовым, имиже воззва Господь святых апостол первых, тако рек: “По Мне грядита, Аз же сотворю вы ловца человеков.” Но внимая сим божественным глаголом, о смиренномудре Иоанне, ты никакоже и не помыслил еси себе быти, жребием подобна Божиим посланником последним и насмертником. Сам Христос тя ведый, тя прослави. Буди же нам увенчание твое к покаянию нелицемерному, воззвание во спасение душ наших.

Глас 1: Бесплотным силам, непрестанно Бога хвалящим, достойно поревновал еси, приснобденный Иоанне, преподобне, любовью огненною твоею, сего ради тех ликостоянием сопричтался еси.

СЛАВА, глас 1: Дивному во святых Своих, Триединому Владыце, пение и исповедание приносиши непрестанно, в Триех Лицех познаваемому, в существе же Едином проповедаемому, храм Свой в души твоей воздвигшему, и светом Своим присносущным осиявшему тя, тобою же и нас просвещающу.

И НЫНЕ: Радуйся, Пречистая Дево, радуйся Богоневесто, радуйся, верных прибежище, радуйся святителей непрестанное пение, радуйся, храмы Твоя возвигнути даровавшая, угоднику Своему блаженному Иоанну, егоже молении приемши, спаси благочестно поющия тя.

НА СТИХОВНЕ стихира глас 1, подобен: Небесных чинов:

Бодрствуя и моляся во дни и в нощи, побеждал еси вся искушения вражия Иоанне святителю терпеливейший, от младенства служити правде истине восхотевый, к небесному царствию всегда устремлен, сущих же зде на земли утешая и милуя.

Глас 6: СТИХ: Во всю землю изыде вещание их и в концы вселенныя глаголы их.

Наслаждение тленное всеконечно отринув, пастырский жезл, яко тяжкий крест восприим, овцы твоя добре управил еси, пред ними ходя и глашая по имени, темже глас твой добре ведуще, по стопам твоим полагал за ны присно, темже и в радость Господа твоего ныне возшед, неотлучен от нас пребываеши.

СТИХ: Небеса поведают славу Божию, творение же руку Его возвещает твердь.

Наставниче воистину всемiрный, благочестия учителю, Духа Святаго сосуде избранный, показался еси, блаженне Иоанне, темже вси концы тобою просвещеннии, вопиют немолчно хвалу твою, от восток солнца даже до запад, в храм твой притекающе к мощем твоим, исцеления и вспоможения в скорбех приемлют, ты бо в радость Господа твоего возшед, неотлучно от нас пребываеши.
 
СЛАВА, глас 6: Образ воистину был еси верным, словом житием любовию, духом верою и чистотою, темже во всю землю изыде вещание исправлений твоих, и на небеси обрел еси мзду трудов твоих, но и земных не разлучился еси, яко источник благодати приснотекущий, мощи твоя нам оставил еси, сего ради молимся ти со страхом: добрый плод духовный принести помози нам, иже даров твоих насладившимся.

И НЫНЕ, Богородичен глас тойже:

ТРОПАРЬ, глас 5:

Попечение твое о пастве в странствии ея,/ се прообраз и молитв твоих, за мiр весь присно возносимых:/ тако веруем, познав любовь твою, святителю и чудотворче Иоанне!/ Весь от Бога освящен священнодействием пречистых Таин,/ ими же сам присно укрепляем,/ поспешал еси ко страждущим, целителю отраднейший.// Поспеши и ныне в помощь нам, всем сердцем чтущим тя.

На утрени
 
 По 1 стихословии: СЕДАЛЕН, глас 6: Радуются днесь православных собори и ликующе светло вопиют, величающе светильника новаго, древним святителем равносиятельна, на конец веков возсиявшаго мiру и земныя вся концы просветившаго Иоанна пречуднаго, преподобным спостника и святителем собеседника, исповедником равнаго крепостию и безмездным целителем венец и украшение, присно молящася о душах наших.

СЛАВА и НЫНЕ, глас тойже: Изнемогает слово, от бренных исходящее уст пети, Владычице, величия Твоя и славити чудеса Твоя во всяком роде и роде, темже краткими глаголы и многим упованием вопием Ти целование архангелово: “Радуйся, Благодатная.”

По 2 стихословии: СЕДАЛЕН, глас 7: Не скорбя, разсеяние русское, во всех концех и языцех оскудевающее, кая бо ныне церковь похвалится таковыми и толикими светильниками веры из тебе возсиявшими, кий же ныне престол архиерейский имать председателя Иоанну подобнаго, не все ли концы собираются ныне к раке мощей его благословение прияти и испросити предстательством его велию милость.

СЛАВА и НЫНЕ, глас тойже: Отчая божественная Премудрость и Слово прежде век глаголемое неотлучное божественныя славы от Тебе, Богомати, нищету нашу восприемлет и в рабий образ нетленне воображается, да к первей славе и лучшему блаженству возведет древле падшия, темже Тя, Владычице, яко Тобою избавленнии немолчно ублажаем.

ПОЛИЕЛЕЙ и ВЕЛИЧАНИЕ:

Величаем тя, святителю отче Иоанне, и чтим святую память твою; ты бо молиши за нас Христа Бога нашего.
 
По полиелеи СЕДАЛЕН святителю глас 4: Славы древних святых преизрядный ревнителю, востоку неведомых и западом небреженных, тех стопам последовал еси, предстательством их покрываяся, единовсельник по смерти явился еси, мы же к твоему заступлению прибегаем ныне: не презри убогих, отче Иоанне, но в святое сие собрание введи нас, яко единонадесятаго часа наемников, да взыдем на место последние, среди первородных церкви торжествующе.
ПРОКИМЕН, глас 4: Честна пред Господем смерть преподобных Его. СТИХ: Что воздам Господеви о всех, яже воздаде ми;
 
ЕВАНГЕЛИЕ от Иоанна, зачало 35, от полу.

По 50 псалме СТИХИРА, глас 6: Избранниче Отчий, Слова служителю верный, и Духа Святаго сосуде преисполненный, ты на камени заповедей Христовых, дом души твоея утвердил еси, и возвеявшим ветром искушений, не падеся внутренняя храмина твоя, сего ради и власть тебе дадеся, чувственному вихрю и трусу запретити, но и нас огради ныне от волн моря житейскаго, пенящагося срамотами своими, и в пристанище тихое управи.

КАНОН Святителю глас 4:

ПЕСНЬ 1.

ИРМОС: Моря чермную пучину, невлажными стопами, древний пешешествовав Израиль, крестообразныма Моисеовыми рукама, Амаликову силу в пустыни победил есть.

ПРИПЕВ: Святителю отче Иоанне, моли Бога о нас.

Благо есть воспевати угодники Божия, в их же лице нам радостне светит святый Иоанн, утешая, врачуя его призывающия, научая нас образом многотрудного жития своего ревновати о помощи сущим в бедах.

О желание сердца боголюбивого! Возжелал еси еще в возрасте детищном! Быти истины поборником! Тако бо плениша тя повести о непощадивших жизни своя за правду Божию множества дивных святых!

Привременно недоуменен был еси о еже воинукий ли путь, гражданский ли себе избрати. Но зреяше в душе твоей крепчайша мысль: всего себе предати на служение святей Христовой церкви.

БОГОРОДИЧЕН: Величит душа Твоя, Владычице, Господа нашего и радуется дух Твой о Бозе Спасе и Сыне Своем! И како смели бы мы воспевати песнь Твою, аще не благоволила бы Сама пророчески рещи, яко ублажат Тя вси роди.

ПЕСНЬ 3.

ИРМОС: Веселится о Тебе Церковь Твоя Христе, зовущи: Ты моя крепость, Господи, и прибежище, и утверждение.

С веселием совершаем память твою, архипастырю наш и наставниче, поклоняемся честным и нетленным мощем твоим.

Восприял еси святое пострижение, оболкся еси во вся оружия Божия, ополчився противу духов злобы поднебесных и побеждая их.

Не давал еси сна довольна очесем твоим, не возлегл еси на одр во еже почити. Уподобился еси отцем древлим, о подвижниче!

БОГОРОДИЧЕН: Богоизбранная Отроковице, приведенная во храм Господень, воспитавшаяся во храме во Святая Святых, истинно вышши еси всех, Дево чистая.

СЕДАЛЕН, глас 4:

Молитва твоя, отче Иоанне, аки столп огненный до небес досягший явися, Израиля новаго путеводящ в житейстем странствии, сего ради чтущим тя терпение даруй и благодарение Господу в сердцах насади, да не якоже ропотницы оныя, египетских мяс рачителие со оными осудимся, но да уподобимся земли Обетованныя нетленных благ насладитися.

СЛАВА и НЫНЕ, глас тойже: Утверждение нам еси, Богомати, и священное прибежище и дерзновение ко Господу обретаем.

ПЕСНЬ 4.

ИРМОС: Вознесена Тя видевши Церковь на Кресте, солнце праведное, ста в чине своем, достойно взывающи: “Слава силе Твоей Господи.”

Множества российских архипастырей наставник, зарубежныя же Церкве начинатель, сам гора любве, тя, святе Иоанне, чудом наших дней именова и в подвизех крепкостоятельна.

Аще хощете святаго жива видети, во град Битоль поспешайте, людие, зрите тамо отца Иоанна! Тако сербский именитый архипастырь изрече, нравом же и делы Иоанновыми восхищенный.

Юношы карпаторусстии, сербкой богословии питомцы, о тебе с великим умилением повествоваху, о твоем к себе непощадении и к ним любве, еже како осенял еси их крестным знамением ты, ходя меж спящими, покой их соблюдая.

БОГОРОДИЧЕН: Пречистая Мати Господа нашего и Дево, милующая и грешнейших рабов Своих, яко милосердия сокровищница пребогатая, обнови нас, обнищавших безмерно, всех скорбящих Заступнице и Радосте!

ПЕСНЬ 5.

ИРМОС: Ты, Господи, мой, свет в мiр пришел еси, Свет Святый, обращаяй из мрачна неведения, верою воспевающыя Тя.

Подражатель истинный Христов ты был еси, душу полагающий за паству свою, и предстал еси пастыреначальнику непостыдно.

Исцелений дар дадеся ти еще в пресвитерстве, приумножил еси и во дни святительства и усовершаеши в ином и вечном житии.

Преподобному Науму был еси содейственник во исцелениях, со иконою его святою посещая домы человеков страждущих.

БОГОРОДИЧЕН: Богородице Дево, вселенной благая Помощнице, Целительнице душ и телес наших, услыши нас и в день сей молящихся Тебе.

ПЕСНЬ 6.

ИРМОС: Возопи прообразуя погребение тридневное пророк Иона, в ките моляся: От тли избави мя, Иисусе, Царю сил.

Яви тя, Святителю чудне, Владыка Христос Церкве Своея Святыя строителя и учителя, даром утешений же и исцелений облагодатствованна.

Поспешал еси и в домы страждущих и в палаты больничныя к недугующим, о нихже сказа ти Господь, яко Пречистых таин его преподатель.

Ты младенцем ходатай цельбы их, святый Иоанне, явился еси, скорбь родительских душ, пременяя на радость, и всем возрастом ты показался еси вожделенный помощник.

БОГОРОДИЧЕН: О Тебе, Богородице Дево, святии всю радостне празднуют, и на Тя уповаем раби Твои мы, многогрешнии, веселися и радуйся, Мати Христа Вседержителя.

КОНДАК, глас 4:

Сердце твое распространися ко всем,/ любовью молящим, тя Иоанне святителю,/ поминающим подвиг всего многотрудного жития твоего,/ безболезненно же легкое преставление твое,// Одигитрии Пречистыя верный служителю.

ИКОС: Небеса ныне с нами срадуются и лицы святых приемлют новое и преславное украшение: апостолы проповедника всемiрнаго целуют, мученицы древнии поют дивно прославльшаго память их, святители собеседуют равному в словеси и премудрости, бденному же подвижнику преподобнии дивятся, царие святии дивнаго молитвенника за восстановление царства православнаго почитают, безсребренники с целителем безмездным мзду нетленную и неделимую разделяют, тако всеславно бысть служение твое, отче Иоанне, тако и венцев тебе исплетеся множество, но молися у лики святых, ихже восполнил еси о припадающих к честным мощем твоим в мире спастися душам нашим.

ПЕСНЬ 7.

ИРМОС: В пещи Авраамстии отроцы персидстей, любовию благочестия паче, нежели пламенем опаляеми взываху: “Благословен еси в храме славы Твоея, Господи.”

Сына света и дне благодать воистину тя содела: на всяк день бо святыми Тайнами укрепляем и обожаем утвердил еси в Господе сердце твое.

Поспешая ко страждущим, присно душу твою за овцы твоя полагал еси, темже и чудотворений дар тебе дадеся, молитвами бо твоими немощствующии препоясашася силою, и нищии в добродетели от гноища страстей воздвигошася.

Зарею пресветлою людем паствы твоея просиял еси, отче Иоанне, внегда смутитися душам их в годину Божия гнева, но помянул есть Господь и милость Свою и смиренныя тобою утеши.

БОГОРОДИЧЕН: Отечества православнаго лишихомся вси мы, Владычице, внегда волны гнева Господня над ним проидоша, зане суетных и ложных хранителие содеяхомся, внегда же скончаватися души нашей, Господа помянухом, да приидет к Нему тобою наша молитва и пение.

ПЕСНЬ 8.

ИРМОС: Руце распростер Даниил, львов зияния в рове затче: огненную же силу угасиша, добродетелию препоясавшеся, благочестия рачители отроцы взывающе: “Благословите вся дела Господня Господа.”

Утренюю духом ко Господу, свет повелений Его на земли возсиял еси, святителю Иоанне, и правде научил еси живущия в дольних, на камене же правды сея и любы твоя утвердися нечестивым неразумеющим на посрамление.

Приял еси воистину дух страха Господня, и поболел еси им, и родил еси дух спасения в людех твоих, темже на образ жития твоего взирающе, отче Иоанне, истинней любви научаемся, лицемерия далече отбегающе.

Егда царства православная на земли падошася и забвению от сынов предана быша, не престал еси победы просити царем благоверным в древних песнех неизменно, яко их держава точию благословенна есть от Бога отец наших.

 БОГОРОДИЧЕН: Отцы наша согрешиша вмале и предани быша в руки врагов беззаконных и лукавшейших паче всея земли, что же сотворим, Владычице, согрешения родительская непрестанно умножающе и како козней лютых избегнем, аще не Ты заступиши кающияся и спасения требующия.

ПЕСНЬ 9.

ИРМОС: Камень нерукосечный от несекомыя горы, Тебе Дево, краеугольный отсечеся, Христос совокупивый разстоящаяся естества, тем веселящеся, тя, Богородице, величаем.

Милостивым предстательством твоим верныя и неверныя пользовахуся и дары благодатныя приимаху, ты же, даруя независтно исцеления, не во тьме прелести пребывати оставляеши заблужденныя, но единаго Царя славы учиши православно воспевати во вся веки.

Избавление изгнанным людем своим дивно сотвори Господь и воздвиже рог спасения нам тя, святителю Иоанне, но и ныне покрый нас от враг наших невидимых и из руки всех ненавидящих нас.

К царству Божию наша направи пути, служивый ему преподобием и правдою вся дни живота твоего, даруй разум спасения людем твоим и просвети во тьме и сени смертней седящия, отче блаженне Иоанне, да радостно поюще совершаем память твою.

БОГОРОДИЧЕН: Настави ноги наша на путь мирен, Всечистая Владычице, мир истинный к человекам приведшая, Сына Твоего Крестом вражду упразднившаго и древняго супостата победно низложившаго.

СВЕТИЛЕН:

Аще и умрох плотию, но жив есмь, не скорбите, людие, сице по преставлении твоем возвестил еси, светом таинственным просвещая тя поющия, отче Иоанне, Святителю предивный.

СЛАВА и НЫНЕ: Мы о Тебе хвалимся, Богородице, и к Богу Тя имамы предстательство, простри руку Твою необоримую и сокруши враги наша, Твоим низпосли рабом помощь от святаго.

НА ХВАЛИТЕХ стихиры Святителю 4, глас 4:

Благодарно воспоим, вернии, Господеви Богу нашему, и восхвалим Его по множеству величествия Его, даровавшаго нам заступника изряднаго, на земли чудотворившаго, и с небесе на убогия призирающаго, емуже ныне приносим пение и к мощем его припадаем со страхом, избавления прегрешений просяще и душам нашим спасения.

Ускорим на молитву, вернии, и пение принесем Господеви Богу нашему, в сердце чистем, яко в тимпане хвалу вопиюще, угоднику его новому и преславному Иоанну, Святителю всемiрному, Православие крепко утвердившему, и лукавство отступников посрамившему, ему-же припадем со упованием, просяще в Православии сохранитися, и душам нашим спастися.

Дивнаго Бога во святых Своих, всякое дыхание псаломски да восхвалит, на конец веков низпославшаго нам чудное утешение, Иоанна святителя всемiрнаго, истины утверждение крепкое, посреде всякия лжи шатаний недвижно пребывающаго, и от мрачныя прелести вся воздвизающаго, и ко спасению нас приводящего.

СЛАВА и НЫНЕ богородичен, глас тойже: Исповедуем дивное заступление твое, не таим еже на нас бывших чудес твоих, ходатаю наш ко Господу святителю Иоанне, имиже упованию православному обучаеши нас, маловерных и унывающих и ропотливых, темже простоту младенческую даруй сердцам нашим, имиже спасаеши от рода сего развращеннаго, вся чтущия достойно память твою.

МОЛИТВА

иже во святых отцу нашему Иоанну, чудотворцу Шанхайскому и Сан-Францисскому

О святителю чудне Иоанне, толико распространил еси сердце свое, яко нетесно вмещается в нем множество почитающих тя человек от различных племен и народов. Призри на убожество словес наших, обаче от любве к тебе приносимое и помози нам, угодниче Божий, поне отныне очищати себе от всякия скверны плоти и духа, работая Господу со страхом и радуяся Ему с трепетом.
И что воздамы тебе за радость оную, юже ощутихом, зря в храме святем мощи твоя святыя и прославляюще память твою.
Воистину, не имамы чим воздати, точию: аще начнем себе исправляти, бывая новыми вместо ветхих.
Сея благодати обновления буди нам ходатай, о святе Иоанне, преставленный от сего временного во иное житие вечное, в неже настави тя Пречистая Владычица, Одигитрия зарубежия и рассеяния русского, чудотворною Своею иконою Коренно- Курскою, Ея же спутник ты явился еси в день преставления своего, о Ней же радуешися ныне в лице святых, славящих единаго в Троице славимаго Бога, Отца и Сына, и Святаго Духа ныне и присно и во веки веков. Аминь.
Категория: Служба | (25.07.2009)
Просмотров: 883
Всего комментариев: 0
Имя *:
Email *:
Код *:
Интернет-журнал

Категории раздела
Житие
Акафист
Служба
Проповеди, выступления
Статьи

Форма входа

Поиск

Корзина
Ваша корзина пуста


 
Конструктор сайтов - uCoz